Lahatsoratra N2 / 2012
pissoa | 03 Mey, 2012 16:40
Dancer in the dark : Sarimihetsika nivoaka tamin'ny taona 2000. I Bjork no "lead".
(Sary tao amin'ny IMDB)
Tamin'ny taona 1964 no niseho ny tantara. Vehivavy notaizain'ny areti-maso, izay nitarika fahajambana mihitsy moa, i Selma. Avy any amin'ny faritra antsinanan'i Eropa izy fa nifindra nonina tao Amerika (tsy tadidiko hoe taiza). Izy sy ny zanany lahy izay voan'ilay areti-maso koa no niaraka nonina tany. Nanofa trano tamin'ny amerikana mpivady izay izy mianaka ary tena nanampy be azy ireo mpivady ireo. Niasa asa roa, ary andro aman'ialina i Selma na dia teo aza ny fahasembanany, ary ankoatra ny asa dia mankafy mozika izy.
Indray andro, kivikivy ilay rangahy tompon-trano ary tonga nitantara tsiambaratelo tamin'i Selma. Efa alina ihany ny andro tamin'izay. Ananan'ny banky vola hono izy nefa tsy mety mahaverina io vola io fa be fandaniana loatra ramatoa vadiny. Mba ho fankaherezana an-drangahy io dia notantarain'i Selma azy koa ny "tsiambaratelony" : Azo tsaboina tsara ao Amerika ny areti-maso nahazo azy mianaka, ary manangona vola mba hahafahana mandidy an-janany no antony hiasana mafy. Tsiambaratelo satria na ny zanany aza tsy nampahafantariny izany sao mampikorontana ny sainy ka mainka hampiombo ny aretiny. Rehefa vita ny resaka dia nitsangana nanao veloma Rangahy fa ndeha hody hono. Somary novohainy ny varavarana dia naveriny nakatony moramora. Niantso azy in-droa i Selma hahafantarana raha efa lasa izy, saingy tsy namaly azy rangahy na dia mbola teo aza. Noheverin'i Selma fa efa lasa ary izy dia navoakany ny vola azony avy any am-piasany, nisainy ary nampiriminy niaraka tamin'ny vola efa voahangony hatramin'izay.
Taoriana kelin'io, avy any am-piasana i Selma, saika hampirina vola toy ny mahazatra azy no nahita fa tsy tao intsony ny vola. Tonga dia fantany fa Rangahy tompon-trano no naka azy. Rehefa nandeha tao amin'ny tompon-trano izy hitady an-dRangahy, dia ramatoa vadiny izay tsy faly tamin'i Selma no nitsena azy teo. "Fantatro daholo" hoy izy mantsy an'i Selma. Gaga izy, dia nanontany hoe inona no tianao ambara. Fantatro hoy Ramatoa fa nanaraby ny vadiko ianao. Mainka nanamafy i Selma fa mitady an-dRangahy izy. Niakatra tao ambony izy ary raha vao nahita azy Rangahy dia nilaza fa tany amin'ny banky izy ny maraina ary tsy maintsy mamerina ilay volan'ny banky amin'izay. Ny kitapo mainty kely any an-tanany ary tao ny vola no napetrany. Volako anie iny hoy i Selma, ary niasa mafy aho vao nahazo an'iny. Omeo ahy ny volako.
Tsy nanaiky mihitsy moa Rangahy ary nomeny an'i Selma ny poleta teny aminy (polisy izy) dia nolazainy i Selma hamono azy fotsiny raha haka ny vola. Rehefa niakatra ilay ramatoa vadiny dia nolazainy indray fa tian'i Selma hangalarina ny vola fa mandehana miantso polisy. Lasa ramatoa, fa mbola nitohy ihany ny adin-drangahy sy i Selma. Ny farany moa dia notifirin'i Selma izy, in-1, in2 ... Rehefa lany ny bala dia novelivelesiny tamin'ny (tsy tadidiko) ny lohany, in-1, in-2, ... in-34. Noraisiny ny vola dia lasa izy.
Rangahy hafa, olon-tiany no nantsoiny hanampy azy rehefa niala tao izy. Tsy nilaza na inona na inona tamin'io izy fa nasainy nanatitra azy tany akaikin'ny renirano fotsiny rangahy io. Nariany tao ny akanjo amboniny, nalainy ny vola dia nariany tao koa ilay kitapo kely mainty nisy azy. Teo ihany dia nandeha tany amin'ny dokotera hitsabo an-janany izy nanatitra ny vola. Nolazainy fa tsy ampy ny vola fa izay ihany no azony atao. Nanaiky rangahy, ary noraisiny ny anarana hahafantarana ilay zaza rehefa tonga hotsaboina izy. Niverina tany amin'ny fiara izy ary rehefa noresen'ilay olo-tiany lahatra dia nandeha tany amin'ny Drama class alehany isaky ny Talata. Tao no tratra i Selma.
Rehefa nandeha ny fitsarana dia tsy niaro tena mihitsy i Selma. Rehefa nanontaniana izy ny antony namonoana ilay rangahy polisy dia nolazainy fotsiny fa rangahy io no nangataka azy ! Voaheloka ho faty ary i Selma ary nalefa tany am-ponja miandry ny andro hamonoana azy.
Rehefa tany am-ponja i Selma dia mbola nitady izay hanafahana azy ihany ilay rangahy olon-tiany. Fantany tamin'izany ny fisian'ilay vola nalohan'i Selma tany amin'ny hopitaly ho fitsaboana an-janany. Namagy an'i Selma ary ny vadin'ilay polisy maty ary nilaza fa afaka averina sokafana ny fitsarana ary mety tsy ho voaheloka ho faty izy raha manao ny asany tsara ny mpisolo vava azy. Nanaiky ny hiaona amin'ilay mpisolo vava vaovao ihany i Selma, saingy rehefa niresaka ny karama izy ireo dia nolazain'ilay mpisolo vava fa efa nalohan'ilay ramatoa vadin'ilay polisy maty ny karamany. Gaga i Selma. Ohatrinona hoy izy ? Rehefa nozohina dia ny vola nalohan'i Selma mba hitsaboana ny zazany no nomen'ilay ramatoa an'ilay mpisolo vava.
Tezitra i Selma, ary nolazainy fa tsy mila averina izany ny fitsarana. Aleo ny zanany no tsaboina mba tsy hiafara amin'ny fahajambana toy ny azy ny aretin-janany.
...
PS: Mba miarova ihany tena fa lasa mandreraka be na ny mijery an'ilay film aza. Soa ihany fa mba misy hira tsara be dia be !
Posted in Ankapobeny . Hametraka hevitra: (5). Verindrohy (trackback):(0). Rohy maharitra